NJOFTIM PËR VEND TË LIRË PUNE
Në mbështetje të Ligjit nr.139/2015, datë 17.12.2015 “Për vetëqeverisjen vendore”; Ligjin nr. 7961,datë 12.07.1995 “Kodi i Punës i Republikës së Shqipërisë” (të ndryshuar), Urdhërit të Kryetarit të Bashkisë Tiranë nr.470, datë 06.01.2022 “Për miratimin e strukturës dhe organikës së Agjencisë së Shërbimeve Funerale, institucion në varësi të Bashkisë Tiranë”, Agjencia e Shërbimeve Funerale shpall procedurën e konkurimit për një vend të lirë pune për pozicionin:
- Përgjegjës Sektori i Burimeve Njerëzore dhe Shërbimeve Mbështetëse– Kategoria e pagës III-a
Përshkrimi përgjithësues i punës për pozicionin është:
- Harton, ndjek dhe kontrollon zbatimin e programeve të këtij sektori.
- Kontrollon punën e përditshme të specialistëve në vartësi, për plotësimin e detyrave që i janë ngarkuar.
- Përgatit parashikimin dhe realizimin e planit mujor të punës të Sektorit dhe e paraqet atë për miratim tek Drejtori.
- Ndjek procesin e punës për verifikimin e listë-prezencave të personelit në përputhje me strukturën e Drejtorisë, raporteve mejkësore, lejeve të zakonshme.
- Ndjek zbatimin e disiplinës dhe orarit në punë.
- Ndjek procesin ligjor për lidhjen e kontratave të punës duke kërkuar të gjithë dokumentacionin e nevojshëm për plotësimin e dosjes në përputhje me aktet ligjore dhe nënligjore, vendimet dhe udhëzimet në fuqi.
- Ndjek procesin dhe zbaton procedurat standarde ligjore për punonjësit të cilët largohen nga puna, duke u kujdesur që baza materiale që ata disponojnë të dorëzohet konform ligjeve dhe rregullave.
- Ndjek dhe kontrollon grafikun e daljeve në pension të punonjësve në Agjencinë e Shërbimeve Funerale në bashkëpunim me Sektorin e Financës.
- Harton programin e lejeve të zakonshme duke marrë më parë konfirmimin e Drejtorëve të Drejtorisë/Përgjegjësve të sektorit.
- Së bashku me specialistët e sektorit ushtron kontrollin mbi zbatimin e disiplinës dhe etikës në punë të punonjësve.
- Merr pjesë dhe është anëtar i komisionit për proçedurat e rekrutimit dhe përzgjedhjes së kandidatëve për vendet vakante në drejtori.
- Ndjek me kujdes plotësimin dhe përfundimin sa më korrekt dhe profesional të formularëve të vlerësimit të performancës për punonjësit e Agjencisë së Shërbimeve Funerale dhe e paraqet atë në mënyrë të përmbledhur tek Drejtori i Financës, Burimeve Njerëzore dhe Shërbimeve.
- Ndjek të gjitha çështjet juridike që lidhen më Drejtorinë e Përgjithshme të Agjencisë së Shërbimeve Funerale, duke vlerësuar dhënien e zgjidhjeve mbi baza ligjore të të gjitha problemeve që dalin gjatë realizimit të aktivitetit institucional.
- Merr pjesë në interpretimin e dispozitave ligjore dhe nënligjore, në proçesin e zbatimit të tyre.
- Është përgjegjës në mënyrë të drejtpërdrejtë për administrimin e proçedurave të prokurimit publik.
- Pasi merr konfirmimin e Drejtorit të Përgjithshëm dërgon për miratim pranë Titullarit të Autoritetit Kontraktor regjistrin e parashikimit të prokurimeve dhe regjistrat e realizimit të prokurimeve që i dërgohen Agjencisë së Prokurimit Publik dhe Bashkisë Tiranë në mbështetje me legjislacionin në fuqi.
1. KUSHTET QË DUHET TË PLOTËSOJË KANDIDATI NË PROCEDURËN E PRANIMIT DHE KRITERET E VEÇANTA
Kushtet që duhet të plotësojë kandidati në procedurën e pranimit për pozicionin Përgjegjës Sektori janë:
- Të jetë shtetas shqiptar;
- Të ketë kryer arsimin e lartë;
- Të ketë zotësi të plotë për të vepruar;
- Të zotërojë gjuhën shqipe, të shkruar dhe të folur;
- Të jetë në kushte shëndetësore që e lejojnë të kryejë detyrën përkatëse;
- Të mos jetë i dënuar me vendim të formës së prerë për kryerjen e një krimi apo për kryerjen e një kundërvajtjeje penale me dashje.
Kandidatët duhet të plotësojnë kriteret e veçanta si vijon:
- Të zotërojnë diplomë të nivelit “Master Shkencor” në profil Juridik/ Ekonomik. Diplomat, të cilat janë marrë jashtë vendit duhet të jenë njohur pranë institucionit përgjegjës për njehsimin e diplomave sipas legjislacionit të arsimit të lartë.
- Eksperienca në punë jo më pak se 5 vjet.
2. DOKUMENTACIONI, MËNYRA DHE AFATI I DORËZIMIT
Kandidatët që aplikojnë duhet të dorëzojnë dokumentat si më poshtë:
- Kërkesë për aplikim (me shkrim dore sipas formatit të publikuar);
- Curriculum Vitae (jetëshkrimi);
- Fotokopje e diplomës së shkollës e noterizuar (përfshirë edhe diplomën bachelor);
- Fotokopje e kartës se identitetit;
- Çertifikatë e përbërjes familjare;
- Çdo dokumentacion tjetër që vërteton trajnimet, kualifikimet, arsimim shtesë, vlerësimet pozitive apo të tjera të përmendura në jetëshkrimin tuaj;
- Fotokopje e librezës së punës (të gjitha faqet që vërtetojnë eksperiencën në punë);
- Motivacioni i largimit nga puna e fundit (nëse është i punësuar ose ka qënë i punësuar);
- Raport mjeko-ligjor;
- Vërtetim i gjendjes gjyqësore;
- Dy fotografi ( përmasa 2.5×3.5 cm).
Dokumentat duhet të dorëzohen me postë apo drejtpërsëdrejti në zyrën e protokollit të Agjencisë së Shërbimeve Funerale brenda datës 16 shkurt 2022.
3. REZULTATET PËR FAZËN E VERIFIKIMIT PARAPRAK
Në datën 18 shkurt 2022, Njësia e Burimeve Njerëzore në Agjencinë e Shërbimeve Funerale do të shpallë në portalin “Shërbimi Kombëtar i Punësimit”, në faqen e internetit të Agjencisë dhe stendat e informimit të publikut, listën e kandidatëve që plotësojnë kushtet dhe kriteret e veçanta për procedurën e pranimit si dhe datën, vendin dhe orën e saktë ku do të zhvillohet intervista. Në të njëjtën datë kandidatët që nuk i plotësojnë kushtet e pranimit për pozicionin e lirë të punës dhe kërkesat e posaçme do të njoftohen individualisht (nëpërmjet adresës së e-mail), për shkaqet e moskualifikimit.
4. FUSHAT E NJOHURIVE, AFTËSITË DHE CILËSITË MBI TË CILAT DO TË ZHVILLOHET INTERVISTA
Kandidatët do të vlerësohen në lidhje me njohuritë në:
- Ligjin nr.9220, datë 15.04.2004 “Për administrimin e shërbimit të varrimit” (ndryshuar me ligjin Nr.80/2014).
- Ligji 162/2020 “Për prokurimin publik”.
5. MËNYRA E VLERËSIMIT TË KANDIDATËVE
Kandidatët do të vlerësohen në lidhje me dokumentacionin e dorëzuar:
Kandidatët do të vlerësohen për përvojën, trajnimet apo kualifikimet e lidhura me fushën, si dhe për vlerësimet e rezultateve individale në punë.Totali i pikëve për këtë vlerësim është 40 pikë.
Kandidatët gjatë intervistës së strukturuar me gojë do të vlerësohen në lidhje me:
a- Njohuritë, aftësitë, kompetencën në lidhje me përshkrimin e pozicionit të punës;
b- Eksperiencën e tyre të mëparshme;
c- Motivimin, aspiratat dhe pritshmëritë e tyre për karrierën. Totali i pikëve për këtë vlerësim është 60 pikë.
6. DATA E DALJES SË REZULTATIT DHE MËNYRA E KOMUNIKIMIT
Në përfundim të vlerësimit të kandidatëve, Njësia e Burimeve Njerëzore do të njoftojë ata individualisht në mënyrë elektronike për rezultatet (nëpërmjet adresës së e-mail). Njësia e Burimeve Njerëzore do të shpallë fituesin në faqen zyrtare të Agjencisë, në portalin “Shërbimi Kombëtar i Punësimit” dhe stendat e informimit të publikut.